::Barsat::

......Us ek ajanabi si barsat ki sham me,

jab chandi ki tiliyon si bunde yun hi barasne lagi......

khidkiyon se dekha,

jane pehchane raste achanak anjan ho gaye.....

dhul gaye se,nayi khusboo lapete,nayi pehchan ke sath...

chalte-chalte jab yun hi sard hawa ko apne shal me lapeta to,

tumhara na hona aur bhi mukammal ho gaya.....

chhuta raha raste bhar barsata pani,

phir bhi tere chhune ka ehsas nahi dhul paya....

band kar li maine aankhe apni,

chehra tera mita diya apne khyal se bhi....

achanak har bhatakata badal tumhari shakl tarasne laga.....

tum gaye,jate hi jindagi ke sare rang bin pani hi dhul gaye,

phir barsat ki ye rumaniyat kyon nahi dhulti.....

main bhul jaun,

par ye barsat tumhe nahi bhulti.......

~~!Ek khwab!~~

Tumhare liye ek khwab bachakar rakha hai,

apne in aawara najron se.......

ek sham hai,

bilkul tapte pighalte sooraj ke sone wali....

samander ke laharon se,

saja ek neela roomani sa rasta....

chandani jahan doodh se nahakar,

dikhayegi hume apni parchhaian.....

kitna kuchh bolti hain,

meri chup chup si pareshan aankhen....

ulajhi-ulajhi har dhadkan,

mere hi aanchal ke sut se.....

dheere se chhuna mera hath,

jaise chand par rakhi ho ungali tumne.....

halke se kano me kehna,

jo sunna hai mujhe barbar....

sharm ko titliyon ke rang,

mere galon par dalkar kho jane do...

lelo apni bahon me aur,

roshan ho jane do is ek ehsas ko....

simati si sahmi si ye rat,

jaise koi aksh ho mera hi.....

is chhawn ko jal jane do,

apne chand ke aanch me...

aankhen jo moond lun to kholun na kabhi...

tumhare liye ek khwab bachakar rakha hai....

Shayad....

....Ek aur intezar jal ke dekho...

in khali raton ko apna koi chand sa mile.

....in chalti firti rahon per....

thama hua koi waqt abhi mile.

....khincha tha apne kajl se tere aksh ka jo dayara...

use bharne ko rang kisi aue aasma se mile.

...jis aarjoo ke sath gujre the unki panaho se kabhi...

us ek tamanna ko shayad koi aur intezar hi mile....

TERI CHAHAT!!!!!!!

Chaha jo tujhe pyar karna.....
to tu meri uljhan ban gaya!


Chaha tujhe bhul jana.....
to tu mera mukaddar ban gaya!


Chaha tuhe na chahna...
to tu mera wajood ban gaya!


Chaha tere pyar ko chhupana...
to tu meri pehchan ban gaya!


Chaha tujhe aankhon me chhupana...
to tu katra aansoon ka ban gaya!


Chaha tujhse jo kuchh na kehna....
to zindagi ka fasana ban gaya!


Chaha tujhse jo kuchh kehna....
to na jane kab anjana ban gaya!


Chaha tere sapno me basna...
to tu ratjagon ka karn ban gaya!


Chaha jo teri subah ko rangana...
to tu neeli shamo ka ghera ban gaya!


Chaha teri aankhon me basna...
to tu khud ek najara ban gaya!


Chaha jo teri zindagi me tham jana...
to tu chalta firta waqt ban gaya!


Chaha tujh me hi kahin bas jana...
to tu hi meri aawargi ban gaya!

BASANTI

Ragon me behta rahe,
tu har hindustani ki kahani banke.......

Seene me dhadke tu,
wahi sailab toofani banke.....

Aankhon se chhalakata sa,
aaj bhi khun-e-rawani banke.......

Aa rang ja fir se,
joonoon-e-basanti me apni jawani banke.....

Naam

Har ek teh me band hai resham si chhuan....
aur har rat palkon ko gudguda jati hai....

khwabon ki chiknai to dekho..
her nind fisal hi jati hai...

chidyon ke par,titliyon ke rang aur bele ki sugandh..,
aaj bhi har rat ko kahaniyon sa bun jati hai....

baste me band us kachhe aam ki khusboo
kyon aaj bhi swad me ghul si jati hai...

us gay ke bachhde ka nam aur uska chalna pehli bar
yad aa aaj bhi masoomiyat si mang lati hai.....

wo gudiya ki shadi aur jhuke neem k pedon ki dali...
jehan me ghul sab gulabi kar jati hai....

pyaj k kuchh phool aur sabke hisse ki alag kyariyan...
kabhi-kabhi har rang ko dhani kar jati hai....

daudti thakati soch ki ladiyan relgadiyon si...
us namkeen se aanchal me jakar tham si jati thi...

khele the kitne hi khel tere aangan me....
tu har khel me mujhse hara karti thi....

kal tha jo bachpan,
aaj us kahni ka NAAM khwab rakha hai..

aur tujhko kya main NAAM doon,
tera NAAM aaj bhi maine maa rakha hai...

Ye kaun poochhta hai...

Barbar ye kaisa dhuan sa uthta hai,
apna ye desh hindustan kyon roz naya aasma dhundhata hai?

Hai apni sarjami to wahi ek si,
fir kyon har basinda iska naya nam dhundhta hai?

Jise yakin hi nahi HINDUSTAN is ek nam par,
kaise wo humse humari pehchan poochhta hai?

Dhadkata hai yahi ek desh jab sabke seene me,
to wo kyon is dhadkan ki boli,bhasha aue rag poochhta hai?

Paida huye jis dharti par hum ek hi nam lekar.
koi humse us dharti par humara adhikar poochhta hai...

Apne chand salon ke kuchh shokhon ke liye,
koi humse humare salon purane sath ka hisab poochhta hai......

nazaren.....

nazren humari jhuk kar uthi nahi....
aur nasha saki ki rooh tak nahi pahuncha.